රැකියා බලපත්‍ර ක්‍රමය මගින් කොරියානු සේවා යෝජකයන් හට තම සේවා ස්ථානයේ රැකියා පුරප්පාඩු සදහා කොරියානු ජාතිකයන් යොදාගනීමට නොහැකි අවස්ථා වලදී ඒ සදහා විදේශික ශ්‍රමිකයන් නිත්‍යානුකුලව යොදා ගැනීමට අවස්ථාව ලැබේ.විදේශ ශ්‍රමිකයන් කොරියාවට හදුන්වා දීම හා කළමනාකරණය කිරීම සංවිධානාත්මක සිදු කරලීම සදහා මෙම බලපත්‍ර ක්‍රමය කොරියානු රජය විසින් 2004 වර්ෂයේ අගෝස්තු 17 වන දින, ශ්‍රීලංකාව,පිලිපීනය,වියට්නාමය,ඉන්දුනීසියාව,මොන්ගෝලියාව හා තායිලන්තය යන රටවල් 06 සමග ආරම්භ කරන ලදී.
වර්තමානය වන විට රටවල් 16 හට රැකියා බලපත්‍ර ක්‍රමය හා එක්වීමට කොරියානු රජය ඉඩ සලසාදී තිබේ.

ශ්‍රි ලංකාවේ රැකියා බලපත්‍ර ක්‍රමය ක්‍රියාත්මක කරණ නියෝජිත ආයතනය වශයෙන් විදේශ රැකියා අමාත්‍යාංශයේ අධීක්ෂණය යටතේ පවතින විදේශ සේවා නියුක්ති කාර්යාංශය ක්‍රියා කරනු ලැබේ. රැකියා බලපත්‍ර ක්‍රමය මගින් ශ්‍රී ලාංකික ශ්‍රමික ප්‍රජාවට නිෂ්පාදන, ධීවර හා ඉදිකිරීම් යන අංශයන්හි කොරියාව තුළ සේවය කිරීමට ඉඩ ප්‍රස්ථාව සලසා තිබේ.

වැඩිදුර විස්තර සදහා:- https://www.eps.go.kr/ph/index.html

ජාතික විශ්‍රාම වැ‍ටුප් සේවය යනු කොරියානු රජය මගින් ක්‍රියාත්මක කරන සමාජ ආරක්ෂණ සේවාවක් වන අතර මෙම ක්‍රමය යටතේ රක්ෂිතයා විශ්‍රාම ගිය පසු, ආබාධිත තත්වයන්ට පත්වූ පසු හෝ මිය ගිය පසු විශ්‍රාම වැ‍ටුප් වල ප්‍රතිලාභ පිරි නැමීම මගින් රක්ෂිතයා හෝ යැපෙන්නන් හට ස්ථාවර ජීවන තත්වයක් ලබාදීම සදහා කටයුතු කරනු ලැබේ.

• ආවරණය -කොරියානු ජාතිකයන් හා සමානවම කොරියාවේ වෙසෙන වයස අවුරුදු 18 ත් 60 ත් අතර පසුවන විදේශිකයන් හට ද මෙහි අනිවාර්‍ය සාමාජිකත්වය ලබා ගත හැක.
• දායකත්වය -රැකියාව සිදු කරන පුද්ගලයාගේ (E -9 වීසා කාණ්ඩයද අඩංගුව) මාසික අදායම ගණනය කර ඉන් 9% ක ප්‍රතිශතයක් මාසික වාරිකයක් වශයෙන් ගෙවනු ලබන අතර මෙහිදී සේවකයාත් සේවායෝජකයත් 4.5% බැගින් මුදල් ප්‍රතිශතයක් තැන්පත් කෙරේ.
• ප්‍රතිලාභ -විදේශික රක්ෂණලාභින් වයෝවෘධ , අබාධිත හෝ යැපෙන්නන් සදහා වූ යන විශ්‍රාම රක්ෂණයන් සදහා හිමිකම් කියනු ලැබේ. එමෙන්ම ඔවුන්ට කොරියානු ජාතිකයන් හා සමානවම විශ්‍රාම රක්ෂණයන්හි ප්‍රතිලාභ ලබා ගැනීමට හැකියාව ලැබේ.
• ප්‍රතිලාභ ලබාගැනීම -අවශ්‍ය ලියකියවිලි සමග ළගම ඇති ජාතික විශ්‍රාම වැටුප් සේවයේ ශාඛාවකට ගොස් වයෝවෘධ , අබාධිත හෝ යැපෙන්නන් සදහා වූ විශ්‍රාම රක්ෂණයන් සදහා ඉල්ලුම් කිරීමට හැකි වේ. අවශ්‍ය ලියකියවිලි භාරගත් පසු ලිපි ලේඛණයන්ගේ ගැටළුවක් නොමැති නම් තමන්ට අයත් විශ්‍රාම මුදල් තම මව්බිම බලා නික්ම යන දිනයේදී ගුවන් තොටුපොළේ දී ලබාගත හැකි වේ.

විශ්‍රාම වැටුප් හිමිකම්ලාභීන් කොරියාවෙන් ශ්‍රී ලංකාව බලා පිටත්ව ගොස් ඇත්නම් ශ්‍රී ලංකා විදේශ සේවා නියුක්ති කාර්යාංශය හරහා අයදුම් කිරීම මගින් ඔවුන්ට අයත් එකවර ගෙවීමේ අරමුදල් ජාතික විශ්‍රාම වැටුප් සේවයෙන් ලබාගත හැකි වේ. අයදුම් පත්‍රය භාරගත් පසු කොරියාවේ පිහිටි ශ්‍රී ලංකා තානාපති කාර්‍යාලය හරහා ජාතික විශ්‍රාම වැටුප් සේවාව වෙත ලබාදීමට ශ්‍රී ලංකා විදේශ සේවා නියුක්ති කාර්යාංශය කටයුතු කරනු ලැබේ. ජාතික විශ්‍රාම වැටුප් සේවාව මගින් සියලුම ලියකියවිලි සම්පුර්ණ වූ පසුව විශ්‍රාම වැටුප්, හිමිකම්ලාභින් හට ඍජුවම ප්‍රතිලාභ දීමට කටයුතු කරනු ලැබේ. ශ්‍රී ලංකාව හා දකුණු කොරියානු රජයන් අතර 2011 නොවැම්බර් මස 11 වන දින ද්විපාර්ශික ගිවිසුමක් මේ සම්බන්ධව අත්සන් කර තිබේ.

වැඩිදුර විස්තර සදහා:- http://english.nps.or.kr/jsppage/english/main.jsp